منتديات سيفن ستارز
عزيزى الزائر نتمنى ان تكون فى تمام الصحة والعافية نتمنا ان تسجل معنا وانشاء الله تفيدنا وتستفيد منا المدير العام لمنتديات سيفن ستارز




 
الرئيسيةالبوابةاليوميةبحـثالتسجيلدخول
ارجو من الساده الاعضاء القدامى تعديل بيانتهم الشخصية
ياجماعة انصحكم بالدخول على المنتدى بالمتصفع العملاق Mozilla Firefox
مشاركتك بالموضوعات تعنى أنك قرأت قانون المنتدى ، وأنك تتحمل المسئولية الأدبية والقانونية عن نشر هذا الموضوع او الردود
تتقدم منتديات سيفن ستارز بأحر التهانى القلبية للأخت رونى المحامية المشرفة على المنتدى القانونى وذلك بمناسبة الزواج السعيد نسأل الله لها التوفيق فى حياتها وألف مليون مبروك لها ولزوجها الأستاذ /حسين إبراهيم حسين وعقبال البكارى وحياة سعيدة ملؤها التراحم والمحبة والقرب من الله
على السادة الأعضاء الإلتزام بالأقسام النوعية للمنتدى عند تقديم مساهماتهم حيث يكون كل موضوع داخل القسم الخاص به حتى يعطى الشكل المطلوب مع سهولة الوصول إليه لكل متصفح .فالموضوعات الخاصة بالمرأة داخل منتدى المرأة .والموضوعات التى تتحدث عن الإسلام توضع فى المنتدى الإسلامى   ...وهكذا ..ونشكر لكم حسن العمل .كما نشكركم على الأداء الممتاز داخل المنتديات..كما نحذر من الخوض أو التطرق لما يمس الغير أو التهجم أو إذدراء الأديان أو الخوض فى موضوعات سياسيه..المنتديات  أصلاً ..منشأة لتبنى وجهة النظر الأجتماعيه والإسلاميه لأهل السنة والجماعة دون التقليل من الغير بل الإحترام المتبادل..وللجميع ودون تميز بجنس أو نوع أو دين أو لون وشكراً لكم جميعاً...
إدارة المنتديات...سيفن ستارز.

شاطر | 
 

 كلمتين و والله قد يكون البوست الأخير .. دا لو لسه فيكم حد بيقرا اصلا

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حسن الذهبى
عضو stars
عضو stars


اسم العضو : حسن الذهبى
الجنس : ذكر عدد المساهمات : 1772
تاريخ الميلاد : 11/03/1956
تاريخ التسجيل : 16/01/2014
العمر : 60
المزاج عال

مُساهمةموضوع: كلمتين و والله قد يكون البوست الأخير .. دا لو لسه فيكم حد بيقرا اصلا   السبت نوفمبر 05, 2016 6:38 am

Mohammed Haffz
*********
كلمتين و والله قد يكون البوست الأخير .. دا لو لسه فيكم حد بيقرا اصلا
=======
الكلمتين دول مني انا
المواطن اللي عاش وعايش لسه في البلد دي
لو بتدور علي كلمتين بتوع لايك وشير ..مش هتلاقيهم هنا
الكلام اللي هاقولهولك دلوقتي دا بتاع المواطن اللي عايش وسط أغلب طبقه في المجتمع واللي معاشر غلابه و اللي بيته ماشي اليوم بيومه
======
قرفتوني وخنقتوني 
كل شويه القرارات غلط .. الدنيا هاتولع ..ماكانش وقته
يا جدعان الرحمة بقي #خنقتونا 
وهي يعني من امتي كانت سويسرا 
يعني هي عشان القرارات اللي اتاخدت دلوقتي… البلد هاتولع ؟
طب لما عيشنا عمرنا كله مفيش قرار اتاخد ؟ .. أيامها كنتوا بتقبضوا باليورو مثلا؟؟
طب هو امتي اصلا اتاخد قرارات صح لما قرارات دلوقتي غلط ؟
=========
ارحمونا والنبي 
البلد دي طول عمرها بيطلع ميتين اهلها من برا وجوا .. ومابتولعش وبنعيش
البلد دي طول عمرها الفقير بيزيد فقر والغني بيزيد غني .. ومابتولعش وعايشين
البلد دي طول عمرها ماشيه بالفهلوه والنصب و فتح عينك تاكل ملبن ..ومابتولعش وعايشين
=========
اللي خربها يروح يعدلها بقي
اللي شايف انها هاتولع.. يبقي ينزل يطفيها
او ينزل يكمل حرق فيها ويريحنا 
انتوا ليه محسسني ان كل واحد فيكم اضطر يبيع عيل من عياله عشان ياكل ويشرب
انتوا ليه محسسني ان الـ 90 مليون كلهم كان ليهم حساب في بنك لحد قبل السنتين اللي فاتوا 
انتوا الشعب اللي بيقف طوابير عشان الآيفون
وانتوا الشعب اللي بيقف طوابير عشان الكومباوندات
وانتوا الشعب اللي عربياته بقت أكتر من البني ادمين في الشوارع
وانتوا الشعب اللي محدش فيه بيتاجر بالفقير الا الغني المستريح اللي مش حاسس بالفقير 
انتوا الشعب اللي جاب عصابه ارهاببه بنت وسخه تحكم البلد
وانتوا الشعب اللي خربها من خمس سنين
وانتوا الشعب اللي كان ومازال فرحان بالفوضي
وانتوا الشعب اللي كان بيعمل كل يوم وقفه لزيادة المرتبات والمصانع بتقفل
وانتوا الشعب اللي كنتوا بتوقفوا النقل العام لحد المرتبات ما تزيد
وانتوا الشعب اللي وقف المستشفيات لحد مطالب الدكاتره ما تتحقق
وانتوا الشعب اللي بيخزن أطنان السكر وبيعطش السوق
وانتوا الشعب اللي بيكتب علي الفيس بلدي مصر وبعدها بيغير الدولار من السوق السوده
وانتوا الشعب اقسم بالله اقسم بالله اقسم بالله اللي بيعيط علي شهيد بيموت من الجيش الصبح وبليل اقسم بالله اقسم بالله انتوا انتوا نفس الناس اللي بليل علي القهوه بتقولوا الجيش حاطط مناخيره في كل حاجه
كفايه ضحك علي الدقون بقي 
=========
ياعم شايفها بتولع 
انزل 11/11 او 12/12 او زي ما قال توفيق عكاشه 13/13
انزل أي وقت و احرقها بجاز.. اتفضل ربنا يوفقك
و شيل السيسي .. انا مش بدافع عنه ولا هدافع عنه
شيلوه ..شيلوه يا عم وريحونا وريحوووه.. شيلوه وهاتولنا واحد محترف 
شيلوه وهاتولنا مرسي تاني ويمين الله مش بهزر 
شيلوه وهاتولنا حمدين او البرادعي ويمين الله مش بهزر
اصل السيسي بيلعبها غلط ..انما دول بيعرفوا يلعبوها صح 
السيسي مفكر انه بيعامل ناس بتفهم اقتصاد وسياسة وتسليح جيش وحوارات و دا مايأكلش عييييش معاكم 
انما التانيين عارفين آخركم .. وإن انتوا ماشيين بالمثل اللي بيقول: أطعم الفم تستحي العين 
لا.. معاكم؟ ..اطعم الفم هاتشبع البطن ..ووقتها تستحي العين وينام المخ اللي بيفكر ، و يأنتخ الضميرررر
=======
ارحموا نفسكم شويه 
ملعون ابو الفيس بوك اللي بقي بيتحكم في مصايركم 
ملعون ابو الفيس بوك اللي بقي مخليكم دلاديل بتعوموا مع موجة الكلام علي الصفحات 
الفيس بوك دا هو اللي اقنعكم ان المتظاهرين ماليين الشوارع في 2011 والحقيقة ان الشعب كله كان قاعد بيتفرج اصلا علي التلفزيون 
الفيس بوك اللي خلق 90 مليون مفتي ديني وخبير رياضي وخبير اقتصادي وخبير عسكري وخبير استراتيجي وخبير فني وخبير اجتماعي 
الفيس بوك اللي اقنعكم ان مبارك عنده 70 مليار دولار ولما نجيبهم هايتوزعوا علينا
الفيس بوك اللي اقنعكم من اسبوع ان جمال مبارك نازل انتخابات الرياسة الجايه
عارفين ليه انتوا الشعب الوحيد اللي الفيس بوك استغله وضحك عليه كده؟
لان انتوا الشعب الوحيد اللي مازال بيكتب كومنت فيه رقم 5 عشان يشوف الصورة وهي بترقص
و انتو الشعب الوحيد اللي بيكتب كومنت سبحان الله علي صورة السمكه التوأم اللي اصطادوها في بحيرة سان عرقسوس في جزر البلالا
وانتوا الشعب الوحيد اللي لسه بينشر الرؤية بتاعت الشيخ حلمبوزو و بيبعتها لعشرة من الاصدقاء وبتخافوا ماتنشروهاش لان الشيخ حلمبوزو قال ان اللي هاتقف عنده الرساله ومش هاينشرها .. هايجيله تبول لا ارادي
========
مش بعفي حد من المسئوليه و أولكم انا 
أنا وغيرنا فعلا فشلنا 
فشلنا اننا نصنع عقول تفكر رغم المحاولات والجهد
فشلنا اننا نخلي الناس تتأكد من كل كلمة بتسمعها قبل ما تنشرها
فشلنا اننا نخلق وعي
فشلنا اننا نخلق بطانة قوية نتسند عليها
مش دفاع عن حد 
ولا سيسي و لا غيره 
بس دي الحقيقة 
احنا اللي بنجيب البلد الارض
وبرضه مش لأن لكم وجهات نظر ان دا غلط و دا صح 
او ان لكم وجهات نظر مختلفه عني
انما عشان طريقة طرحكم الفاشلة اللي تجيب أي بلد الارض 
انتوا أوووڤر في كل حاجه
أوڤر في فرحتكم بأي حاجة… أوڤر في خوفكم ورعبكم من كل وأي حاجة
=======
نهاية الكلمتين
انا لما ولعت البلد في 2011 و اتهدت علي دماغ ابونا .. كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما مسك الاخوان وفشخوا البلد 
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما مسك السيسي علي مدار السنتين اللي فاتوا 
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما الدولار كان ب 18 جنيه ونص .. كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
ولما الاسعار زادت والسكر قل والرز قل والزيت قل
كنت عايش وباكل وبشرب واصحابي ومعارفي فاتحين بيوت ومحدش فيهم بيشحت
كل دا وانا واللي بتكلم عنهم محسوبين مع الرأفة على الطبقه الوسطى
ومرتباتنا زي الزفت والطين والقطران 
وأهالينا عندهم امراض وليهم علاج ومصاريف 
وكل حاجه ممكن تتخيلوها
يعني الخلاصه 
بطلوا هري بقي في الفاضي والمليان 
اقسم بديني ما بيعترض ويكتبلكم كلام عن المطحونين والتعبانين الا المستريح والمرتاح واللي بيته مش ناقصه حاجة ومش حاسس بحد أصلا و بيتكلم علي سبيل الترفيه
يعني من الآخرررر
سيبوا اللي يتكلم .. اللي لمسه وجع او ضغط
يعني سيبوا الغلابه اللي ماعندهومش فيس بوك هما اللي يقولوا رأيهم
يعني سيبوا الناس اللي بتطلع علي تاكسي ولا بتطلع تشيل طوب ورمل كل يوم علي باب الله هما اللي يتكلموا
لما دول ينزلوا يولعوها بجاز وسخ نبقي نفكر نبص للأمر بقى
======
والله صدقوني 
الأجر علي الله وحده
قعدتي هنا علي المخروب دا ولا بتديني فلوس ولا السيسي بيديني عليها مرتب
بس والله العطيم 99% من اللي بيكتبلكم علي الفيس بيصوتوا من العيشة و مخليين الحياه سوووواد وإن خلاص بنموووووت زيهم زي اللي بيقعدوا يشربوا حجر المعسل علي القهوه بعشرة جنيه زيهم زي اللي بيتغدي صنف وبليل بيطلب الديلفري زيهم زي اللي كل يوم بيدفع 30 جنيه علي ريق النوم الصبح عشان يشتري علبة السجاير الأجنبي … معظمهم ناس حزينه انها عايشه وبتدفع فلوس و معترضين لأنهم عاوزين يتمتعوا بكل متع الحياه ببلاش
و بجد والله العظيم منه لله حسني مبارك 
اللي عودنا علي ترييح الدماغ
والدعم علي كل و أي حاجة
اللي كان ناقص يدعم البامبرز ..لحد ما حسينا انه حق مكتسب
وكان بيوفر الاحتياجات وخلاص من غير ما يقولنا الديون قد إيه والأزمه حجمها إيه ولا كان بيشركنا معاه .. كان بيسد بوءكم وخلاص والبلد بتتملي ديون ومحدش حاسس
ولا كان حد فينا يفتح جرنال .. ولا حد يفهم في سعر الدولار النهارده ايه 
كنا بناكل وننااااام وبس 
وياريته عجب .. نزلتوا شيلتوه
وولعتوا البلد وخربتوا السياحة ومكنتوا الارهاب منها و خلصتوا على الاحتياطي النقدي 
والاخر بعد كل دا .. لما جه واحد بيصارحنا بالحقيقه 
اتخضيتوا وخوفتوا وافتكرتوا فجأه اننا شعب فقير واننا بلد واقعة 
ياريت مبارك كان اتعامل معانا التعامل الطبيعي 
وخلانا نشيل اللي البلد بتشيله 
كان سقانا الخرررره من بدري 
عالأقل ماكناش استغربنا طعمه دلوقتي
** ابقوا افتكروا بس انه في يوم من الأيام هفكركم إن سبب الاحباط و القرف والاشمئزاز
ماكانش الاخوان اللي بنحارب فيهم ليل ونهار 
ولا اللي بيتهكموا علي كلامنا عن المؤامرات 
ولا اللي ضد البلد وجيشها 
ولا إعلام تركيا وقطر المضلل
افتكروا إن اللي كانوا السبب هما الأغلبية مننا اللي اكتشفت فجأة ان نفسهم قصير و تحملهم ضعيف و وعيهم صفررر ، وانهم مجرد أكوانتات فيس بوك تكتب كلمتين عن الوطن ، بس لما يقروا كلمتين تانيين بيتحولوا في لحظة
وسلاموا عليكوا
E.E
----------------------------
By: Eslam Elbahrawy
الرجوع الى أعلى الصفحة اذهب الى الأسفل
 
كلمتين و والله قد يكون البوست الأخير .. دا لو لسه فيكم حد بيقرا اصلا
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات سيفن ستارز :: قسم الموضوعات العامة :: الموضوعات العامة-
انتقل الى: