منتديات سيفن ستارز
عزيزى الزائر نتمنى ان تكون فى تمام الصحة والعافية نتمنا ان تسجل معنا وانشاء الله تفيدنا وتستفيد منا المدير العام لمنتديات سيفن ستارز




 
الرئيسيةالبوابةاليوميةبحـثالتسجيلدخول
ارجو من الساده الاعضاء القدامى تعديل بيانتهم الشخصية
ياجماعة انصحكم بالدخول على المنتدى بالمتصفع العملاق Mozilla Firefox
مشاركتك بالموضوعات تعنى أنك قرأت قانون المنتدى ، وأنك تتحمل المسئولية الأدبية والقانونية عن نشر هذا الموضوع او الردود
تتقدم منتديات سيفن ستارز بأحر التهانى القلبية للأخت رونى المحامية المشرفة على المنتدى القانونى وذلك بمناسبة الزواج السعيد نسأل الله لها التوفيق فى حياتها وألف مليون مبروك لها ولزوجها الأستاذ /حسين إبراهيم حسين وعقبال البكارى وحياة سعيدة ملؤها التراحم والمحبة والقرب من الله
على السادة الأعضاء الإلتزام بالأقسام النوعية للمنتدى عند تقديم مساهماتهم حيث يكون كل موضوع داخل القسم الخاص به حتى يعطى الشكل المطلوب مع سهولة الوصول إليه لكل متصفح .فالموضوعات الخاصة بالمرأة داخل منتدى المرأة .والموضوعات التى تتحدث عن الإسلام توضع فى المنتدى الإسلامى   ...وهكذا ..ونشكر لكم حسن العمل .كما نشكركم على الأداء الممتاز داخل المنتديات..كما نحذر من الخوض أو التطرق لما يمس الغير أو التهجم أو إذدراء الأديان أو الخوض فى موضوعات سياسيه..المنتديات  أصلاً ..منشأة لتبنى وجهة النظر الأجتماعيه والإسلاميه لأهل السنة والجماعة دون التقليل من الغير بل الإحترام المتبادل..وللجميع ودون تميز بجنس أو نوع أو دين أو لون وشكراً لكم جميعاً...
إدارة المنتديات...سيفن ستارز.

شاطر | 
 

 بوستات الزمن الجميل والجيل الأجمل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
بنت مصر
عضو stars
عضو stars


اسم العضو : بنت مصر
الجنس : انثى عدد المساهمات : 1555
تاريخ الميلاد : 03/06/1980
تاريخ التسجيل : 03/04/2012
العمر : 36
المزاج عال العال

مُساهمةموضوع: بوستات الزمن الجميل والجيل الأجمل   الجمعة سبتمبر 30, 2016 2:51 pm

وأزيدك من الشعر بيت أحنا الجيل اللى حضر معرض الغنائم فى أرض المعارض بالجزيرة ودخل دبابات السنتيريون  وكل واحد خد له حته منها ده فك مسمار وده قطع سلك من الشبكة وانا واحد من اللى أخد قطعة من الشبك السلك  من على موتور الدبابة  السنتريون الإسرائيلية ورقصنا فوق الدبابات بأرض المعارض على أغانى محمد نوح الوطنية مدد مدد مدد شدى حيلك يابلد اما ماسبق بالبوست فوالذى نفسى بيده  حضرته كله بمكمله ومجمله  وكان لى اقارب من شهداء الجيش سواء فى حرب افستنزاف أو حرب أكتوبر ومن شهداء مصنع أبى زعبل لقد  مرت ذكرى عبد لناصر وأقسم بالله زرفت عيناى بالدموع وأنا أشاهد المناظر للجنازة بالتلفزيون وكأنها حدثت اليوم فلازالت  فى ذاكرتى مشاهد الجنازة الحقيقية ولازلت أحفظ نشيد الوداع ‘نها جزء من جينات حياتى مصر اولا وقبل كل شيئ




تمت إضافة ‏‏2‏ صورتين جديدتين‏ من قبل ‏‎Mohammed Haffz‎‏.
‏21‏ ساعة · 
نوستالجيا الزمن الجميل 
=============
احنا الجيل اللي فتح عينه على " بابا جمال" بيكرّم الأوائل في عيد العلم ، وكتبنا الواجب في كراسات مكتوب على ضهرها حب لأخيك ماتحب لنفسك واغسل يديك قبل الأكل وبعده ، وسمعنا أم كلثوم في حفلة على الهوا بتقول ياحبيب كل الحبايب الحاضر واللي غايب وفي أفراحك نهني ونغني كلنا تعيش وتسلم يا وطني ، واتبرعنا لمعونة الشتا وفتحنا دفتر توفير في الابتدائي بمصروفنا لأن بقرش الادخار نتحدي الاستعمار ، وحلمنا مع عبد الحليم بتماثيل رخام على الترعه واوبرا في كل قرية عربية ، واحنا اللي دقنا مرارة النكسه ٦٧ ووجعها وشفنا دموع اهالينا والهزيمة زي السكينه في قلوبهم وشفنا عبد الناصر مكسور مهزوم بيتنحى بعدما تحمل المسئولية ، وشفنا الملايين في الشوارع بتصرخ حنحارب حنحارب ، وعرفنا انه لاصوت يعلو فوق صوت المعركة وان ما أُخذ بالقوة لايسترد بغير القوة ، وعشنا تجربة إعادة بناء القوات المسلحة المصرية وشحنات السلاح الروسي وبناء حائط الصواريخ واستشهاد الفريق عبد المنعم رياض رئيس الأركان على الجبهة وسط جنوده ، احنا اللي عشنا وعلي شبابيك البيت جلاد أزرق وقدام مدخل كل عمارة حيطه طوب لزوم لو حصل قصف او تفجير قنابل ماتنفجرش في مداخل العمارات ، احنا اللي شفنا قصف اسرائيل لمصنع ابو زعبل وقتل عماله المدنيين وشفنا مذبحة بحر البقر وقصف مدرسة الاطفال وسمعنا الدرس انتهى لموا الكراريس بالدم اللي علي ورقهم سال ... وشفنا وعشنا الاستعدادات للحرب وتحرير الأرض ....
احنا الجيل اللي اشترى الجزمة الكاوتش من باتا واشتري هدومه من عمر أفندي بالقسط ببطاقة الموظفين اللي بتقسط التمن بضمان مرتب الأب ، واللي حضر الخيّاطة في البيت تفصل للأم والعيلة كلها ، الجيل اللي شاف أجمل اولاد مصر علي الجبهة ٦ سنين في الاستعداد للحرب وحضر مبادرة روجزر ومذبحة ايلول الاسود وشاف جنازة عبد الناصر ملايين في الشوارع وملايين الملايين بتعيط في البيوت ، وحضر حرب الاستنزاف وضرب حائط الصواريخ والغني من أهالينا ركب عربية نصر من انتاج النصر للسيارات ودخلنا مدارس الحكومه لأننا متفوقين والمدارس الخاصه للبُلدا والساقطين ، وعمرنا لا خدنا درس ولا مجموعة ولا فصول تقويه ، احنا الجيل اللي حضر التلفزيون بيتدي الساعه خمسه ويقفل الساعه ١٢ وسمعنا الراديو وابله فضيله وزيارة لمكتبه فلان وحول الاسرة البيضاء وطريق الالف ميل يبدا بخطوة ، احنا اللي عشنا امهاتنا بتقلع دبل جوازها وتتبرع بيها للمجهود الحربي وشفنا الست بتعمل حفلات في الدنيا كلها لاجل المجهود الحربي ، وشفنا فريدة فهمي ومحمود رضا سفراء الفن المصري في العالم كله وفرقة رضا بترقص قدام الريس وتغني ناصر عامر ، احنا اللي حضرنا العبور يوم ٦اكتوبر وغنينا الله واكبر فوق كيد المعتدي وتابعنا البيانات العسكرية وفرحنا بعبد العاطي صائد الدبابات وزغرطنا لما اسرنا عساف ياجوري يوم معركة الدبابات وعيطنا بالدموع ايام الثغرة ، احنا الجيل اللي شاف اهله بيتهجروا من مدن القناة بعد ٦٧ وعشنا نحتفل بعيد النصر ٢٣ديسمبر و عيد الوحدة ٢٢فبراير و عيد الثورة ٢٣ يوليو ونستني حفله عبد الحليم اللي حيحضرها الزعيم جمال عبد الناصر ، احنا اللي سمعنا السادات في خطبته الشهيرة في مجلس الشعب ٢٢ اكتوبر لما قال اصبح لهذا الشعب درع وسيف ، احنا اللي حضرنا حرب اكتوبر ونصرها وشفنا قطع البترول العربي عن اوربا وامريكا وشفناهم بيقفوا طوابير في محطات البنزين مرعوبين من الشتا والبرد وقرروا من وقتها يدمروا بلادنا ويستولوا علي البترول علشان مانوقفهمش طوابير تاني ... 
احنا الجيل اللي اتربى على ان الوطن في غلاوة الأم والأب وأغلى والدم علشانه رخيص والضنا فداه شرف والدفاع عنه واجب والموت من اجله كرامة .... 
احنا الجيل اللي كبر علي إن العمل عبادة والإيد البطالة نجسة وحلمنا قبل ما نتخرج نشتغل ونشيل نفسنا ولو نقدر نرد جميل أهالينا ، اتعلمنا مانقولش اشمعني ولا نبص لغيرنا ، يبقي عندنا طموح كبير، لكن مانبصش لغيرنا ولا نقول هو ليه كده واحنا كده ، كنا واثقين في قدراتنا واننا نقدر نزحزح الجبال بعزيمتنا من مكانها ، اتعلمنا ان السلم بيبتدي من تحت لفوق واللي يبص لفوق يتعب انما ياخد السلم درجه درجه وان الله لايضيع من احسن عمله ، احنا الجيل اللي ركب الاتوبيس درجه تانيه بقرش لان درجة اولي منظرة مالهاش لزمة .. احنا الجيل اللي أكل الفاكهه بعد ماترخص ولاعمره يبص عليها في اول الموسم ولا يقول نفسي وطوله البال تنول الامل ولما الفاكهة ترخص خالص نعمل منها مربي وشربات وعصير والبيوت عمرانه بخيرات الامهات وتعبها ، احنا الجيل اللي كان عنده حصاله يحوش فيها المصروف والعيديه ولما تتملي نفتحها ونشتري بيها اللي اهلنا يوافقوا عليه ، احنا اللي طلعنا في بيوت بتقرا الجرايد والمجلات والكتب واتعلمنا ان للوقت قيمه لازم نستغلها في حاجة مفيدة مش نضيعها اونطه ولازم نقرا لأن العلم نور ونستلف الكتب من مكتبة المدرسة ونتبادل مع بعض المجلات ونتفرج علي التلفزيون بمواعيد والسهرة قدامه يوم الخميس بس وننزل نلعب مع القرايب والجيران في الشارع قصاد البيت والشارع كله عينه علينا ومخلي باله منه وكل عيل معروف اهله مين واي راجل كبارة في الشارع له كلمة علينا كلنا ... 
احنا الجيل اللي اتخرج واشتغل وفرح بأول مرتب مهما كان صغير وحس ان له قيمة 
احنا الجيل اللي قرا انيس منصور واحسان عبد القدوس ويوسف السباعي ويوسف ادريس ونجيب محفوظ ويحي حقي وعبد المنعم الصاوي ومحمد عبد الحليم عبدالله وطه حسين وتابعنا كل يوم كاريكتر صلاح جاهين في جريدة الأهرام وغيرهم واتفرجنا علي مسرحيات المسرح القومي والطليعه والجيب وحضرنا حفلات الربيع بتاعت عبد الحليم وفريد وعيطنا يوم جنازة عبد الحليم كأنه اخونا اللي مات ... 
احنا الجيل اللي كبر علي التلفزيون العربي وبرامجه وسمع مسلسات البرنامج العام وبرامج صوت العرب والبرنامج الموسيقي بعد نص الليل وسمعنا اذاعه ام كلثوم تبتدي الساعه خمسة وتخلص عشرة وساعات حداشر واحنا بنذاكر .... 
احنا اللي كلنا الشوكولاته الكرونا الزرقا والحمرا والشوكولاته الروكيت والبيمبو وكلنا الأرواح وصوابع الموز وشربنا الليمونجو والاورانجو ومصر كولا وسباتس واتفرجنا على صندوق الدنيا وبتاع البيانولا والأراجوز وكنا بناخد مصروف قرش وساعات تعريفه ولما دخلنا الجامعه وصل المصروف خمسه جنيه في الشهر بالمواصلات واللي كانت فسحتنا بيت الجد والعم والخال وبالكتير قوي جنينه الحيوانات والهرم ... 
الجيل اللي اتعلم ان الحياة تستحق تتعاش ولازم نبذل فيها جهد علشان نحترم نفسنا ويحترمنا الاخرين ... 
الجيل اللي اتعلم ان الدنيا هات وخد وما استحق أن يولد من عاش لنفسه والولد الطين يجيب لأهله النعيل وان عندنا حاجات كتيرة قوي نخاف عليها اهمها اسمنا وسمعتنا وسيرة عائلاتنا فلا نتحامق ولا نتهور ولا نندفع فنأتي لأهلنا باللوم والعار ... 
وأهم من كل ده وفوقه احنا الجيل اللي فتح عينه وهو واخد باله انه ينتمي لوطن عظيم ولقينا روحه بنحبه قبل مانفكر ليه ونحترمه ونديه عينينا قبل مايطلب ...واتربينا وكبرنا واحنا بنفكر فيه زي مابنفكر في اهلنا وأولادنا وأكتر شوية .. 
احنا اللي عرفنا مصر وحبناها وعرفنا يعني ايه نحافظ عليها وندافع عنها من اول نفس في عمرنا ولغاية مانموت ... 
وعلي فكرة احنا اللي كنا في 30 يونيو بنهتف ونعيط ونصرخ من قلوبنا مصر مصر مصممين ننقذها وان شالله كلنا نموت ، ماهو ده اللي اتعلمناه من أهالينا واتربينا عليه وكبرنا فيه .... مصر .. مصر
.
--------------------------

By: Amira Abdalla






الرجوع الى أعلى الصفحة اذهب الى الأسفل
 
بوستات الزمن الجميل والجيل الأجمل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات سيفن ستارز :: قسم الموضوعات العامة :: الموضوعات العامة-
انتقل الى: