منتديات سيفن ستارز
عزيزى الزائر نتمنى ان تكون فى تمام الصحة والعافية نتمنا ان تسجل معنا وانشاء الله تفيدنا وتستفيد منا المدير العام لمنتديات سيفن ستارز




 
الرئيسيةالبوابةاليوميةبحـثالتسجيلدخول
ارجو من الساده الاعضاء القدامى تعديل بيانتهم الشخصية
ياجماعة انصحكم بالدخول على المنتدى بالمتصفع العملاق Mozilla Firefox
مشاركتك بالموضوعات تعنى أنك قرأت قانون المنتدى ، وأنك تتحمل المسئولية الأدبية والقانونية عن نشر هذا الموضوع او الردود
تتقدم منتديات سيفن ستارز بأحر التهانى القلبية للأخت رونى المحامية المشرفة على المنتدى القانونى وذلك بمناسبة الزواج السعيد نسأل الله لها التوفيق فى حياتها وألف مليون مبروك لها ولزوجها الأستاذ /حسين إبراهيم حسين وعقبال البكارى وحياة سعيدة ملؤها التراحم والمحبة والقرب من الله
على السادة الأعضاء الإلتزام بالأقسام النوعية للمنتدى عند تقديم مساهماتهم حيث يكون كل موضوع داخل القسم الخاص به حتى يعطى الشكل المطلوب مع سهولة الوصول إليه لكل متصفح .فالموضوعات الخاصة بالمرأة داخل منتدى المرأة .والموضوعات التى تتحدث عن الإسلام توضع فى المنتدى الإسلامى   ...وهكذا ..ونشكر لكم حسن العمل .كما نشكركم على الأداء الممتاز داخل المنتديات..كما نحذر من الخوض أو التطرق لما يمس الغير أو التهجم أو إذدراء الأديان أو الخوض فى موضوعات سياسيه..المنتديات  أصلاً ..منشأة لتبنى وجهة النظر الأجتماعيه والإسلاميه لأهل السنة والجماعة دون التقليل من الغير بل الإحترام المتبادل..وللجميع ودون تميز بجنس أو نوع أو دين أو لون وشكراً لكم جميعاً...
إدارة المنتديات...سيفن ستارز.

شاطر | 
 

 مالاتعرفه عن الجيش المصرى العظيم

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حسن الذهبى
عضو stars
عضو stars


اسم العضو : حسن الذهبى
الجنس : ذكر عدد المساهمات : 1872
تاريخ الميلاد : 11/03/1956
تاريخ التسجيل : 16/01/2014
العمر : 60
المزاج عال

مُساهمةموضوع: مالاتعرفه عن الجيش المصرى العظيم   الأحد نوفمبر 23, 2014 6:27 am

Mohammed Haffz
15 ساعة · تم التعديل ·
مـــا لاتــعــرفــه عــن الـجــيــش الــمصـــري الــعــظــيــم ...
===============================
المقال ده خاص جداً ، و شيق جداً ، و طويل شويه ..... فحضروا كوباية شاي أو مج نسكافيه وأقعدوا أقروه بتركيز وعلى مهلكم..... لأننا هنتكلم فيه عن الجيش المصري العظيم و قدراته.
يمكن فيه ناس كتير تعرف ان الجيش المصري جيش قوي، و لكن متعرفش أي تفاصيل ..... عشان كده هنركز النهارده على جيشنا ..... الجيش المصري ..... أقدم جيوش في العالم .... و خير أجناد الارض...... و ليه بيتعمله ألف حساب ..... و ليه هو دائما الرقم الصعب في أي معادله إقليمية ..... زي مثلا من ثلاث شهور لما ايران شمت نفسها شويه على دول الخليج ... قامت لقيت الجيش المصري بيعمل مناورات في السعودية و الامارات و البحرين .... قام اتكتموا و مسمعناش ليهم حس لغاية دلوقتي ..... و ليه التركيز عليه لغاية دلوقتي كبير لاسقاطه و تفكيكه ....
• لكن قبل ما نتكلم لازم نتفق على شوية مبادىء علشان ما نقعش في المحظور :-
------------------------------------------------------------------------------------------------
1- الجيش المصري في الستينات كان ينتهج سياسة الردع بالإعلان ..... زي ايران و اسرائيل و أمريكا و دول كتير ما بتعمل لغاية دلوقتي ..... يعني لما يصنع أو يجرب سلاح جديد ..... يعمل اعلان كبير و ينزل صور و يعمل مهرجانات ..... ( تجربة الصاروخ القاهر – تصنيع الطائرة المقاتلة حلوان وكايرو 300– عرض عسكري لقدراته – ..... الخ ) ، وده كان أصلا أسلوب مقبول وقتها ، لكن ثبت فيما بعد إن ضرره أكتر من نفعه ..... وعشان كده من أول السبعينات اتخذ الجيش سياسة مختلفة تماما للردع و هي سياسة الغموض والصمت .... عدوك تتسرب له من مصادر معلوماته أخبار بتقول ان عندك بلاوي و انت ساكت و لا كأن عندك حاجة .... فيقلق منك أكتر ..... و دي استراتيجية نتائجها أكبر بكتير من البروباجندا و سياسة الاعلان .... عشان كده أكتر من مرة الرئيس السيسي يقول ان محدش يعرف قدرات الجيش المصري غير شخصين أو تلاته فقط في الدولة .
2- هنحاول نتكلم بشكل مبسط على قدر الامكان لأن فيه ناس كتير معندهاش الثقافة العسكرية أو الموضوع بيبقي تقيل عليهم .
3- كلامنا كله هيكون كلام عام و في نقاط محددة و بدون الخوض في أسرار ،و عشان محدش يسألنا عن مصادر .... و عشان برضه ما نقعش في المحظور .... مش هنقول ان الكلام ده من خبرات شخصيه لكن اعتبروا كلامي ده دردشة نت بننقل من معلومات منشورة في مجلات متخصصه تم نشرها على مدار سنوات في الإعلام الأجنبي و العربي و المصري من قبل.
4- أهم حاجة بقى، و لأني عارف ان للأسف فيه كائنات هلامية عايشة و سطينا و شباب كيوت ساقط بنطلونها من يتامي البنا و شمامي كلة من يتامى يناير بتوع يسقط يسقط ...... عندهم حساسية و حرقان من أي موضوع يخص الجيش ..... فياريت يوفروا وقتهم و وقتنا و مايقروش المقال .... لأن بالنسبه لي أي حد هيعلق و يستخف دمه أو يتطاول على الجيش المصري مالوش عندي غير البلوك على طول و من غير نقاش. ( آه هي ديكتاتورية )
-------------------------------------------------------------------------------------------
• شوفوا بقي..... الجيش المصري ده حدوته كبيرة جدا و ميعرفهوش بجد غير اللى اشتغل فيه و عاش حياته كلها يخدم فيه .... و أهم ما يميز الجيش المصري هو عقيدته القتالية الفريدة ..... لأنه دوناً عن جيوش العالم كله فهو بيعتمد على الفرد قبل المُعدّة و السلاح ..... بمعني إن العلوم العسكرية دائما بتقيم قدرات الجيوش و بتبني خططها العسكرية في أي معركة على حسب نوع التسليح اللى بيمتلكه الجيش ، و بعد كده مدى قدرة الأفراد على استيعاب قدرات السلاح ده .... بعكس الجيش المصري اللى هو الجيش الوحيد في العالم اللى بيعتمد فى بناء خططه على قدرات الفرد أولا ثم يدعمها بالسلاح المتوفر .... و ده بيدي دائما نتائج خارج نطاق العلم العسكري و خارج المقرر، و عمر ما حد بيقدر يتوقع الجيش المصري ممكن يعمل إيه..... و ده سبب انه في أي معركة أو حتي مناورة بيدخلها الجيش المصري بتسمع بعدها مصطلح إن المعركة دي غيرت العلوم العسكرية و بتدرس في المعاهد و الكليات العسكريه العالميه..الكلام ده مش من فراغ ، ولا هو مجرد عبارات انشائية بلاغية...
• من أوضح الأمثلة على الكلام ده هو اقتحام الساتر الترابي و المانع المائي في 73.... العلم العسكري على طول بيتجه أولا إلى نوع السلاح ..... فكل الخبراء العسكريين العالميين اتفقوا على إنه يلزم قنبلة نووية للقضاء على الساتر الترابي و تحصينات خط بارليف .... و أنه حتي في وجود قوات مسلحة بأرقى الأسلحة (و اللى بالفعل ماكانتش موجودة وقتها لأننا كنا بنحارب بسلاح قديم يعتبرمن مخلفات الحرب العالمية الثانية) .وانه حتى في وجود أرقى الأسلحة، فمن 50% إلى 75% من القوات سيتم القضاء عليها أثناء العبور ....... أما العسكرية المصرية فعقيدتها مختلفة و فريدة ..... في الأول الجندي هو اللى عبر .... و خلّص القصة بخرطوم حريق و بعد لما خلّص ..... عدت الدبابة و المعدة و السلاح ..... فدايما الاجابة بتبقي خارج المقرر و علي أساسها بـ يتم تغيير العلوم العسكرية الغربية و الشرقية .
• مثال تاني و من أيام حرب اكتوبر..... كان فيه مشكلة وقود الصواريخ المضاده للطائرات ..... اللى أوقف تصديره الروس لمصر عقابا على طرد الخبراء الروس ...... و أصبحت الصواريخ قبل المعركة مجرد قطع حديد لا قيمة لها ..... و كان أياميها تصنيع وقود الصواريخ يعتمد على علم متقدم جدا و كانت فيه 3 دول فقط في العالم هي من تملك تكنولوجيا و أسرار صناعته ..... في 6 أشهر فقط كان دكاتره مدنيين مع سلاح المهندسين المصريين توصلوا الى التركيبة و كيفية انتاجه بأساليب عبقرية محدش فكر فيها قبل كده، و قبل المعركة بأسابيع قليلة كانت مصر قد انتجت 150 طن من الوقود ده ..... و تم إدخال علم تصنيع وقود الصواريخ الى مصر ..... و الروس أصابهم الذهول لما شافوا الصواريخ بتصول و تجول و تسقط الطيارات الاسرائيلية .... برضه كلمة السر هو الفرد اللى غير خط سير المعركة
• مثال ثالث و من أيام حرب اكتوبر برضه..... الدبابة المصرية مداها المؤثر كان 800 متر و كانت بتواجه الدبابة الاسرائيلية اللى مداها المؤثر 1500 متر ..... فكان القرار أن يتم مواجهة اللواءات المدرعة بأفراد المشاة لأول مرة في التاريخ ..... يعني لواء مشاة يواجه كتيبة مدرعات !!!..... و ده عمره ما حصل في التاريخ العسكري ..... أو مثلا زي 10 أفراد يذهبوا و يعودوا عوما لتفجير ميناء حربي لأول مرة في التاريخ العسكري ..... برضه كلمة السر هنا الفرد اللى ممكن يعوض الفرق الرهيب في امكانيات التسليح
• و للأسف دايما بيحصل خلط عند ناس كتير انهم يقولوا ان الجيش أيام اكتوبر حاجة و دلوقتي حاجة تانية.....وكلامهم صحيح ، فهو بالفعل حاجه تانيه لأن الجيش الآن أقوى عشرات المرات عما كان عليه أيام حرب اكتوبر ..... و خليني أكلمكم في نقط مباشرة و دايما حـ ندي اشارات و مقارنات على الجيش الأمريكي أو الأعداء المحتملين لينا.
• أي جيش في الدنيا في أي حرب أهم سلاح فيه و هو السلاح الحاسم على الأرض هي القوات البرية..... لأنها هي اللى بتحسم على الأرض .... القوات الجوية تدعم و تساعد ، وبتعمل غطاء أو تمهيد نيراني و لكن اللى بيخلص على الأرض فعليا هم القوات البرية ..... و القوات البرية المصرية سواء مدرعات أو مشاه أو مشاه ميكانيكي أو مدفعيه او قوات خاصه بكل أنواعها بتعتبر من
الرجوع الى أعلى الصفحة اذهب الى الأسفل
حسن الذهبى
عضو stars
عضو stars


اسم العضو : حسن الذهبى
الجنس : ذكر عدد المساهمات : 1872
تاريخ الميلاد : 11/03/1956
تاريخ التسجيل : 16/01/2014
العمر : 60
المزاج عال

مُساهمةموضوع: رد: مالاتعرفه عن الجيش المصرى العظيم   الأحد نوفمبر 23, 2014 6:27 am

أقوى الجيوش إقليميا .... و هديكم مثال صغير من حرب الخليج
• مصر اشتركت في حرب الخليج بـ 35000 مقاتل محترف عبارة عن فرقتين..... الفرقة الثالثة مشاه ميكانيكي و الفرقه الرابعة المدرعة ( و ما أدراك ما الفرقة الرابعة المدرعة المصرية..اللي خدم في الجيش فيكم أكيد عارفها كويس ) ، و بقوات خاصة و دفاع جوي و وحدات ادارية ووحدات إسناد ...... و اللى ميعرفش يعني إيه فرقة ..... فـ الفرقه بتتكون عادة من 3 ألوية و كل لواء بيتكون من حوالي 5 كتائب وكل كتيبة بيتراوح عددها بين ألف إلى ألفين مقاتل)، لكن مش عايزين نخش في تفاصيل لأن الأعداد دي بتختلف من فرقة المدرعات الى فرق المشاه الميكانيكي ..... المهم ..... الفرقة دي تشكيل قتالي كبير جدا وبيترواح عدد أفرادها من 10 آلاف إلى 15 ألف مقاتل
• عند وصول الفرقة الثالثة مشاه الميكانيكي المصرية لمكان تمركزها كان يجاورها كتيبة مشاه أمريكية جايه بقالها 3 أيام و كانوا لسه بيجهزوا المعسكر بتاعهم (الفرقة تحتوي حوالي على 18 كتيبة تقريبا)..... و في الصبح صحى الأمريكان لقوا الفرقة المصرية بالكامل أتمت عملية تمركزها و المعسكر المصري اتبني و خلص بكل تجهيزاته و القوات نازله طابور الصباح و جاهزة للقتال و ده يدل على انضباط و احترافية عالية جدا.
• الأمريكان وضعوا خطة تحرير الكويت بحيث تتجنب القوات الأمريكية الاشتباك المباشر مع القوات العراقية،و أن تقوم بالالتفاف عليها من غرب الكويت ثم تتجه يمينا لتطويق الكويت و فصلها عن الاحتياطيات التعبوية الموجودة في البصرة جنوب العراق وبكده تدخل القوات الأمريكية لتحرير الكويت من الشمال ...... و كان الدور المصري يتلخص في أن تكون على يمين القوات الأمريكية كحاجز بين القوات العراقية و الأمريكية بطول الحدود الكويتية الغربية لتقوم بحماية أجناب القوات الأمريكية و تقوم بالانقضاض على الكويت من حدودها الغربية لشغل القوات العراقية و امتصاص كل الضربات المدفعية و الصاروخية على ما تتحرك القوات الأمريكية و تقوم بالهجوم من الأجناب شمالا و تدخل الكويت و بذلك تقوم هي بتحرير الكويت بعد ما تكون القوات العراقيه أنهكت تماما .... يعني بالبلدي كده ..... سيب العراقيين و المصريين يعجنوا في بعض و المصريين ياخدوا كل الضربات المركزة ، و أنا ألف من وراهم و أدخل على الجاهز .
• و بالفعل كان صدام حسين عامل تحصينات رهيبة يقال انها أحدث بكتير من تحصينات و عوائق خط بارليف.... لدرجه انه كان حافر خنادق و ترع بالكيلومترات ماليها بترول علشان أي قوات تحاول تعبرها يولع فيها.... ده غير غابات الألغام اللى زرعها و كثافة الدبابات و المدفعية و الصواريخ المجنحة الصينية المتطورة قصيرة و متوسطة المدى.
• الجميل في الأمر ان القوات المصرية فاجأت قوات التحالف انها دمرت كل منصات الصواريخ بعيدة المدى في العمق الكويتي و اقتحمت كل التحصينات العراقية و دمرت كل تحصيناتها بسرعة و احترافية عالية فاقت كل المعدلات في العلوم العسكرية و بأقل الخسائر و بخطط و تكتيكات محدش شافها أو درسها قبل كده و دخلت الكويت قبل الوقت المحدد بعشر ساعات و قبل التفاف القوات الأمريكية من الشمال.... و دخلت بالفعل مدينة الكويت..... لدرجة إن الامريكان اطالبوا بوقف تقدم القوات المصرية لحين وصول عناصر أمريكية عشان تتصور المدرعات الأمريكية في شوارع الكويت بالعلم الأمريكي في نشرات الأخبارعلى انها هي من حررت الكويت
• الأهم بقي و ده اللى عليه العين..... اللى عاصر الحرب دي زي حالتنا ماكنش بيسمع من أمريكا غير على 3 أسلحة كانت أمريكا عاملاها البعبع للعالم كله .... و كانت صور الثلاث أسلحة دول بتتعاد في كل النشرات بكثافة على انها أحدث و فخر التكنولوجيا العسكرية الأمريكية و هما دول اللى هيخلصوا في الحرب دي و أي حرب مستقبلية و هم الطائرة الشبح B117 و الصواريخ المجنحة كروز و منظومة باتريوت المضادة للصواريخ ..... و دول كانوا أول مرة يتم استخدامهم فعليا في عمليات حقيقية .... الجميل بقي ان الجيش المصري علّم على الأمريكان علامة عمرهم ما هينسوها ..... فكان السبب انه يطلّع سلاحين منهم من الخدمة نهائيا و التالت يدخل في مرحلة إعادة تصميم من أول وجديد .... ازاي ؟؟؟
• أولا: هنتكلم على المرحومة الطائرة الشبح B117 اللى صورتها منورة في الصورة فوق .... الطائرة الشبح كانت مصممة بحيث أنه لا يمكن أكتشافها بأي وسيلة على أي رادار ..... يعني الطيارة من دول تدخل أي دولة و تضرب أي أهداف من ارتفاعات عالية و محدش يشوفها و لا يعرف جت منين و لا راحت فين ..... الدفاع الجوي المصري توصل الى نظرية و طريقة عبقرية لإكتشاف الطائرة دي على الرادار باستخدام رادارات قديمة معدلة في سلاح المهندسين المصريين تعمل على الموجات UHF اللي كانت بتستخدم في الحرب العالمية التانية..... فكانت حرب الخليج أحسن فرصه لتجربة الرادار ..... و أول لما راحت وحدات الدفاع الجوي و شغلت الرادار كانت الطائرة الشبح منورة على الرادار المصري ولا قمر 14....... و الأمريكان إتصدموا وعملوا مشكلة كبيرة ساعتها و كأنهم كانوا بيحلفونا منقولش لحد الاكتشاف ده ، لأن كده هيروح عليهم مئات المليارات المدفوعة لتصنيع الطائرة دي لأنها فقدت أهم ميزة لها و أصبحت طائرة عادية زيها زي أي طائرة مقاتلة أخرى ..... و لأن فيه تعاون تقني كبير في الدفاع الجوي المصري من زمااااان ما بين مصر و روسيا و أوكرانيا و يوجوسلافيا ..... استعار الصرب نفس النظرية المصرية في اسقاط نفس الطائرة في أول طلعة ليها في حرب يوجوسلافيا و انتشرت نكتة هناك ساعتها و هي " Opps … we don’t know it was visible " ....ومن ساعتها الطائرة دي طلعت من الخدمة
• السلاح التاني اللى اترمي برضه في الزباله بسببنا هي منظومة باتريوت.... .... و مع انه تم ادخال تعديلات كتير عليها حاليا الا اننا منسمعش عنها حاجه دلوقتي ...... الامريكان أول لما راحوا السعودية نشروا بطاريات الباتريوت لمواجهة الصواريخ العراقية ..... و ثمن بطاريات الصواريخ دي كان غالي جدا و تكلفة تشغيله عالية ..... و مع ذلك كان الأمريكان بيقولوا فيها شعر و إنها منظومه مفيش بعد كده ...... المهم .... وحدات الدفاع الجوي المصري نشرت نظام صواريخ مصري خاااالص ..... رخيص جدا .... مضاد للطائرات و الصواريخ و أي حاجة بتطير على ارتفاعات منخفضة ..... و غير قابل للتشويش ..... و اسمه "نظام آمون" ...... العراق لما ضربت قوات التحالف بصواريخ كروز المجنحة بكثافة فشلت بطاريات الباتريوت في اسقاط أي منها ..... و النظام المصري قضي علي أي صاروخ سواء كان سكود أو كروز في القطاعات المنتشر فيها ..... و دي كانت ضربة قاضية أخرى للسلاح الأمريكي، و الكويت تعاقدت مع مصر لشراء المنظومة ..... و الأمريكان عملوا مشكلة كبيرة للضغط على مصر لبيع عدد من البطاريات دي ..... و انتهت ببيع مصر لعدد من بطاريات النظام آمون لأمريكا في مقابل صفقة كبيرة من طائرات الأباتشي اللى كان الأمريكان بيرفضوا بيعها لمصر ..... و بدأوا في تعديل تصاميم صواريخ الكروز الأمريكية لأنها فقدت قيمتها بعد وجود نظام دفاع جوي مصري بيصطادهم زي الذباب
• الخلاصة هنا في انك تستنتج حاجة مهمة جدا..... إن السلاح الأمريكي و التكنولوجيا الأمريكية قبل ما تطلع و يتم نشرها للقوات الأمريكية .... بيكون الجيش المصري جاب تفاصيلها و اشتغل على أسلحة لمواجهتها و تطليعها من الخدمة أساسا و هو قاعد ساكت و محدش بيعرف ايه اللى توصل ليه الجيش المصري غير بالصدفة البحتة ..... و ده سبب إصرار الامريكان على عمل مناورات النجم الساطع مع الجيش المصري لانهم بيجوا يتعلموا عندنا و يشوفوا ايه الجديد اللى وصلناله .... و هو برضه سبب الكلمة اللى اتقالت كتير لما ألغت أمريكا مناورات النجم الساطع " ان الامريكان هم الخسرانين " .... و دي فعلا حقيقة .... و يا ريت كنتوا تقدروا تشوفوا جنودهم و قادتهم كان بيحصل فيهم ايه أيام المناورات ..... و اللا لما كانت حبيبة قلبنا الميج 21 القديمة لما كانت بتسقط الـ F15 الأمريكية الأحدث في سلاح الطيران الأمريكي .
• و لو جينا اتكلمنا على القوات الخاصة المصرية فحدث و لا حرج..... فإذا كان بيقال ان القوات الخاصة المصرية مصنفة انها السادسة على العالم و في مواقع بتقول انها الرابعة ..... لكن الأكيد ان قوات الصاعقة البحرية هي الأولى على العالم بدون منازع .... و ده مش من دلوقتي ..... الصاعقة البحرية المصرية مفترية و سابقة العالم بسنين ضوئية و متفوقة علي أي مثيل ليها في أي جيش في العالم من أكتر من 45 سنة من أيام الهجوم على ميناء ايلات 3 مرات ...... فلغاية النهاردة أي معدلات بتعملها أقوى صاعقه بحرية في العالم شوف هي قد ايه ..... و اضربها في اتنين يطلعلك معدلات التنفيذ المصرية .... و مقدرش أقول أي تفاصيل تانية أكتر من كده.
• و بدون الخوض في التفاصيل، و لكن العسكريين فاهمين كلامي كويس جدا ..... فيه كتير من الطيارين المصريين و قائدي القطع البحرية و قائدي المشاه و المدرعات ليهم تكتيكات و مناورات و خطط مسجلة باسمهم في العلوم العسكرية و يوجد تكتيكات لم يفعلها إلا ضباط مصريين حتي الآن .... القصة هنا انه ممكن يعرف إيه السلاح اللى عندك سواء كان شرقي أو غربي ..... لكن اللى بيجننهم انهم ميعرفوش لما المنظومات دي تتحط و تشتغل مع بعض هيكون الناتج بتاعها ايه .؟؟؟؟؟ ..... و حتي لو عرف اكيد مش هيعرف عقل المقاتل اللى بيطور فيهم و اللى بيستخدمهم ممكن يطلع ناتج شكله إيه .... و الأهم و اللى يجنن أكتر ان الجيش المصري مش بيتكلم و لا بيقول حاجة .... سااااااكت .... و ده ردع في حد ذاته ..... و دي تلخص الكلمه اللى قالها الرئيس السيسي .... الجيش المصري نار .... لا يتلعب بيه و لا يتلعب معاه .
• القصة في الجيش المصري انه الجيش الوحيد في العالم اللى حارب بالسلاح الشرقي و حارب بالسلاح الغربي بعد ما هضم عقيدتهما القتالية.... و عنده خبرات متراكمة كتييييير، و فوق ده كمان الجيش المصري ليس مستخدم للسلاح.... و لكن مطور ليه.... بمعني أي سلاح ليه نقاط قوة ونقاط ضعف.... فنقاط ضعف السلاح الشرقي بيكملها بالسلاح الغربي و العكس..... و بعدين يضيف ابتكاراته عليه .... فيكون الأداء و الناتج خرافي و بأقل التكاليف ..... يعني ممكن تلاقي منظومة دفاع جوي فيها رادار شرقي على صاروخ غربي زايد عليهم ابتكارات مصرية من الخبرات المتراكمة .... ممكن يطلعلك منظومة رخيصة التكاليف و بتدي نتائج أكبر بكتيييييير من منظومات شهيرة و غالية جدا ..... ده بخلاف استثماره و اعتماده على الفرد اللى بيستخدم السلاح زي ما قلنا ..... فالنتائج دائما بتطلع خارج التوقعات و خارج المقاييس العسكرية..... و لو حد فكر يهجم عليه حيبقي داخل الحرب و هو مش عارف أي نقاط الضعف و القوة في السلاح المستخدم فعليا علشان يلعب عليها ...... زي اللى حصل في المناورة بدر الكبرى سنة 1996 اللى رعبت اسرائيل و أمريكا ، وعشان فيه ناس كتير ما يعرفوش اللي حصل..... خلونا نتكلم عليها بالمرة.
• في سنة 1996 تم تنفيذ المناورة بدر ، و هي من أكبر المناورات التي تمت في تاريخ القوات المسلحة المصرية و اشترك فيها الجيشين الثاني و الثالث الميداني كاملين مع القوات الجوية و الدفاع الجوي و الوحدات الخاصة و 70 قطعة بحرية ... و كانت الخطة الأساسية للمناورة هي محاكاة صد هجوم محدود من الجبهة الغربية و الجنوبية كأي مناورة عادية ..... و عشان تبقوا عارفين ..... لما الجيش المصري بيعمل مناورة .... دول كتير جدا بتطلب تبعت مراقبين عسكريين و خبراء يحضروا المناورات دي و بيركزوا أقمارهم الصناعيه لمراقبة اللى بيحصل لأنها بتبقي فعلا فرجه و بيشوفوا إيه الجديد عندنا .
• المهم و مع بدء المناورة و لسبب ما.... و بدون سابق انذار..... جت أوامر عليا مفاجئة حتى للقادة الأواسط في الجيش بتغير الأوامر و شكل المناورة الى صد هجوم كاسح من الشمال الشرقي... يعني من اسرائيل...... يعني محدش من القوات أو القادة كان مستعد لحجم و شكل المناورة...... وده كان مفاجأة لاسرائيل اللى دب فيها الرعب و ذكرها بمفاجأة حرب اكتوبر .... لأن معدلات التنفيذ تخطت معايير العلوم العسكرية و بالذات ازاي جيش بقاله 23 سنة في حالة استرخاء عسكري بعد آخر حرب شاملة حاربها يقدر يوصل للمعدلات دي في حجم مناورة بالضخامة دي .
• الجيشين الثاني و الثالث نجحوا في الاستنفار و الجاهزية لتنفيذ الأوامر الجديدة في ١١ دقيقه فقط..... و تم نقل نصف معدات و قوات الجيش المصري عبر قناة السويس داخل سيناء في ٦ ساعات فقط ، و هذه المعدلات العالية أدت الى دب الرعب في قلب إسرائيل ، و تم إستنفار الجيش الاسرائيلي الى الحالة القصوى، و تدخلت أمريكا للاستفسار و طالبت بعدم تكرار هذا الاستفزاز مرة أخري و كانت أزمة كبيرة ساعتها ، .. و لكن في وقتها كانت الرسالة الى إسرائيل و الرسالة وصلت ... و أصدر مركز الدراسات العسكريه للبنتاجون أكثر من ١١ دراسه مستفيضة عن هذه المناورة و حتي الأن فهي مجال نقاشات في مراكز الدراسات العسكرية و الاستراتيجية على مستوى العالم.
• و لأول مرة العالم يشوف في مناورة بالحجم الضخم و كمية القوات دي الطائرة الميج بتطير جنب الـ F16 و الدبابة الابرامز و الـ M60 الأمريكية ماشيين جنب الدبابة الـ T54 و الدبابة T62 الروسية و مجنزرات النقل الشرقية و الغربية و منظومات الدفاع الجوي الشرقية و الغربية و المصرية و كله شغال مع بعضه في تناغم رهيب و بيتم استخدامهم بحرفية شديدة جدا .
• و على فكرة.... الاسم الكودي للجيش المصري في المخابرات الأمريكية هو "The Rock " أي الصخرة و هما بيعملوله ألف حساب لأن قوته تكمن في عقيدته القتالية و الادارية ..... فهو من أفضل جيوش العالم من الناحية الادارية .... فهو أنجح منظومة موجودة في مصر..... و نجح الجيش انه يطلع نفسه تماما من اعتماده على أي قطاع مدني و أصبح يعتمد على موارده الذاتيه سواء في التمويل أو في احتياجاته اليومية من أكل و شرب و تموين و نقل و خلافه ..... زي كده بنزينات وطنيه اللى اختير أماكنها استراتيجيا لخدمة القوات في أوقات الحروب ..... أما في وقت السلم زي دلوقتي فبتخدم عادي على المدنيين ...... و زي مصانع " المكرونة يا منى " و الأكل اللى امكانياتها تقدر توفر الغذاء لمليون و نصف مليون جندي مستدعي احتياطيا وقت الحروب ، و لكن لأننا في حالة سلم و العدد ده مش مستدعي حاليا فبتستخدم طاقتها في المجال المدني ..... فحسب تقارير البنك الدولي ...... مخصصات الجيش في الموازنة لا تتعدى 2% من موازنة الدولة ..... و بيتم تمويل كل اللى اتكلمنا عليه ده من موارده الخاصة و مشاريعه الانتاجية..... يعني مش بياخد حاجه من حد زي الفاشلين الكذابين و الأغبياء و دلاديل النوشتاء ما بيقولوا ان 40% من الموازنة و الاقتصاد في إيد الجيش ......
• يا ترى عرفتوا بقى ليه هيموتوا نفسهم لاسقاط الجيش ؟ ...... و ليه هيبيضوا علشان يكشفوا ميزانية الجيش و التسليح ...... و الجيش بيعمل مكرونه يا منى.... و لازم نراقب الميزانية يا منى ؟؟؟؟
• طبعا التفاصيل عن الجيش المصري كتير جدا، لكن مش كل حاجه ينفع نتكلم عنها..... لكن الحاجة الأكيدة، و اللى مفيش اختلاف عليها إن جيش مصر جيش عظيم جداً، و شريف جداً، و بالفعل قوته من شرفه... و لا عزاء للخونه و الحاقدين ..... عاش الجيش المصري العظيم.
‫#‏مصر_مقبرة_الغزاة‬
‫#‏تحيا_مصر‬
‫#‏الجيش_المصرى_رجال‬
‫#‏كلنا_الجيش_المصرى‬
‫#‏كلام_في_الصميم‬ .




الرجوع الى أعلى الصفحة اذهب الى الأسفل
 
مالاتعرفه عن الجيش المصرى العظيم
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات سيفن ستارز :: قسم الموضوعات العامة :: الموضوعات العامة-
انتقل الى: