منتديات سيفن ستارز
عزيزى الزائر نتمنى ان تكون فى تمام الصحة والعافية نتمنا ان تسجل معنا وانشاء الله تفيدنا وتستفيد منا المدير العام لمنتديات سيفن ستارز




 
الرئيسيةالبوابةاليوميةبحـثالتسجيلدخول
ارجو من الساده الاعضاء القدامى تعديل بيانتهم الشخصية
ياجماعة انصحكم بالدخول على المنتدى بالمتصفع العملاق Mozilla Firefox
مشاركتك بالموضوعات تعنى أنك قرأت قانون المنتدى ، وأنك تتحمل المسئولية الأدبية والقانونية عن نشر هذا الموضوع او الردود
تتقدم منتديات سيفن ستارز بأحر التهانى القلبية للأخت رونى المحامية المشرفة على المنتدى القانونى وذلك بمناسبة الزواج السعيد نسأل الله لها التوفيق فى حياتها وألف مليون مبروك لها ولزوجها الأستاذ /حسين إبراهيم حسين وعقبال البكارى وحياة سعيدة ملؤها التراحم والمحبة والقرب من الله
على السادة الأعضاء الإلتزام بالأقسام النوعية للمنتدى عند تقديم مساهماتهم حيث يكون كل موضوع داخل القسم الخاص به حتى يعطى الشكل المطلوب مع سهولة الوصول إليه لكل متصفح .فالموضوعات الخاصة بالمرأة داخل منتدى المرأة .والموضوعات التى تتحدث عن الإسلام توضع فى المنتدى الإسلامى   ...وهكذا ..ونشكر لكم حسن العمل .كما نشكركم على الأداء الممتاز داخل المنتديات..كما نحذر من الخوض أو التطرق لما يمس الغير أو التهجم أو إذدراء الأديان أو الخوض فى موضوعات سياسيه..المنتديات  أصلاً ..منشأة لتبنى وجهة النظر الأجتماعيه والإسلاميه لأهل السنة والجماعة دون التقليل من الغير بل الإحترام المتبادل..وللجميع ودون تميز بجنس أو نوع أو دين أو لون وشكراً لكم جميعاً...
إدارة المنتديات...سيفن ستارز.

شاطر | 
 

 الطريق إلى القطيع .. وكيفية التجنيد الإخواني ...(هام للغاية .. خدوا بالكوا من عيالكوا)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
حسن الذهبى
عضو stars
عضو stars
avatar

اسم العضو : حسن الذهبى
الجنس : ذكر عدد المساهمات : 2347
تاريخ الميلاد : 11/03/1956
تاريخ التسجيل : 16/01/2014
العمر : 61
المزاج عال

مُساهمةموضوع: الطريق إلى القطيع .. وكيفية التجنيد الإخواني ...(هام للغاية .. خدوا بالكوا من عيالكوا)   الأحد أكتوبر 19, 2014 6:42 am

Mohammed Haffz
46 دقيقة ·
الطريق إلى القطيع .. وكيفية التجنيد الإخواني
==========================
(هام للغاية .. خدوا بالكوا من عيالكوا)
------------------------------------------
هما ازاي الإخوان بيقدروا يوصلوا اتباعهم انهم يبقوا زي القطيع كده ويصدقوا أي حاجة تتقالهم حتى لو كانت أبسط قواعد العقل ترفضها ؟؟.. ده السؤال اللي دايما نساله لنفسنا .
أقولكوا .. بس ركزوا وماتزهقوش ..
كل واحد فينا .. بتعدي عليه فترة فوران واضطراب نفسي شديد .. عامل زي فوران زجاجة البيبسي اول ما تفتحها قبل ما تهدا بعد شوية .. الفترة دي كلنا عارفينها .. فترة المراهقة .. يعني اواخر اعدادي وثانوي و كلية ..
الفترة دي بتبقى انفعالاتنا فيها شديدة الحساسية والتطرف .. لما نحب بنحب اوي اوي .. ولما نكره بنكره أوي أوي أوي .. ولما بنلعب .. ولما بنغضب .. ولما بنهزر .. ولما بنتقدر .. ولما بننجرح .. كل حاجة بتبقى زي الجلد الملتهب ..
ولازم تيجي لكل واحد منا عاطفة فطرية ناحية الدين في وقت ما .. احساس بالذنب والتقصير .. ورغبة شديدة في التقرب لربنا بأي شكل .. فاكرين لما في فترة بدأنا نقوم الفجر علشان نصلي في المسجد؟؟ و لمينا كل شرايط الكاسيت بتاعتنا وبعضنا رماها علشان الأغاني حرام؟؟ انا باكلم مواليد اواخر السبعينات واوائل التمانينات تحديدا ..
هي دي بقا .. الفترة المستهدفة بتاعت جماعات الظلام والضلال .. شباب التيار الإسلامي اللي بتلاقيهم في كل شبر في الكلية .. بصوتهم الواطي وابتسامتهم اللزجة اياها ، ومذكرات الشرح والأسئلة اللي بيكتبوا عليها آيات قرآنية .. ودعوتهم المستمرة ليك انك تيجي تصلي معانا الضهر جماعة في المسجد .. وجو الأذكار والنقاء الخلاب اياه ..
شوية وصلاة الجماعة تقلب حفظ قرآن وتسميع .. وشوية الدرس في مسجد الكلية بعد صلاة الضهر .. شوية وتروح تصلي معاهم في الجامع اللي بيصلوا فيه .. او يسلموك لأخ تاني ماسك جامع اخوانجي قريب من بيتك علشان السيطرة تبقى أسهل .. على مظاهرتين في الكلية علشان فلسطين تحس بعدهم انك شيخ المجاهدين .. كده ظبطت ..
بعد شوية .. تبدأ الفلترة .. الشباب العادي اللي معندهوش مشاكل نفسية .. الفوران والحماس بتاعهم بيقل .. وواحدة واحدة يرجع لطبيعته .. يكلم زميلاته في الكلية اللي قاطعهم .. ويطلع شرايط الكاسيت اللي خباهم .. ومرحلة وعدت .. والشاب في الغالب بيطلع من المرحلة الدينية دي ملهوف على قصة حب و بيقع في أول واحدة يقابلها .. فوران عاطفي بعد مرحلة الفوران الديني ..
أما الشباب اللي بيعاني من ضعف شخصية .. أو قلة ثقة .. أو عدم قبول من اللي حواليه .. أو فقر وتدني في المستوى الاجتماعي ورفض للمجتمع لأي سبب ، وخصوصا هؤلاء القادمين من الأرياف والقرى النائية واللي عادة بتحصل لهم نوع من الصدمة النفسية في بداية حياة الجامعة واختلاطهم بحياة المدن و "بنات البندر" زي ما بيقولوا ، فبيبدأوا يعيشوا فيما يشبه الجيتو ،، خصوصا داخل المدن الجامعية ..الشاب من النوعية دي بيلاقي نفسه في الجو ده .. خلاص بقا أحسن من كل الوحشين اللي بره دول .. صاحب قضية .. وبيدافع عن الإسلام .. واللي حواليه دلوقتي بيعاملوه بإحترام .. ويبدأ يسعد بوضعه الجديد .. خلاص .. اللي كان ملوش قيمة .. بقا ليه قيمة ومكانة عظيمة
وهنا بقا .. وقع الزبون .. واتلقط .. وبيبدأوا يربوا فيه حاجتين .. العزلة .. والكراهية .. احنا نوع مختلف من البشر .. احنا أصحاب دعوة .. احنا ربنا اختارنا لهداية الناس .. احنا لا خير الا فينا .. الناس اللي بنكرههم دول بيكرهوا الإسلام ، بس لازم نضحك في وشهم ومانبينش كرهنا ليهم .. لكن احنا عارفين اننا أحسن منهم وأعلى مقاما عند ربنا ..
وبعد العزلة .. و الكراهية .. وسلب الدماغ بإسم الدين .. تبدأ بقا الأنشطة .. والمعسكرات .. وايام الإعتكاف .. تربي في دماغهم فكرة السمع والطاعة .. ولاية الفقيه .. اللي يقوله القائد ينفذ حرفيا .. ولا يجوز الخروج عليه .. لإنه يعرف اكتر منك .. ويأكدوا على الرسالة دي في كل درس من دروس مشايخهم ..
مهما قالولك علينا ماتصدقش .. مش انت بتشوفنا بنصلي جماعة؟؟ يبقى لو شفت حد فينا بيكذب ولا حتى بيشرب خمرة .. اعرف انه مكر ودهاء عظيم وفيه حاجة انت مش فاهمها .. احنا قياداتنا قيادات ربانية .. وهبوا أنفسهم لله .. يا ريتنا نطول نبقى جزمة في رجلهم .. ممنوع الجدل .. او الإعتراض .. ولا تنازعوا فتفشلوا وتذهب ريحكم ..
وماتسمعش وماتقراش غير مننا .. علشان اللي ضدنا وحشين وبيكرهوا الدين وبيشوهونا .. وبعدين يبدأوا استغلال اي موقف او اختلاقه .. لتشويه وهدم معارضيهم .. ودي فايدة المحرمات اللي اكتر من نصها من اختراعهم .. ده مراته مش محجبة .. ده ابنه بيعزف موسيقى .. ده ابوه بيدخن .. أي حاجة تزود الكراهية والغل تجاه اللي ضدهم ..
وعلشان تثبت الزبون أكتر وأكتر .. لازم تحوطه بهالة من الشعارات .. علشان تقدر دايما تستفز حماسه وقت اللزوم .. الإسلام .. الخلافة .. الأمة .. الجهاد .. النصر .. الدعوة .. الإخوة .. الشريعة .. وغيرها من المصطلحات الرنانة .. اللي لو لقيت الزبون بيحاول يخلع منك .. استخدمها علشان تسخنه تاني وتثبته في القطيع ..
وخليه على طول في شغل .. علشان مايلاقيش وقت يفكر .. ولا يكسر حالة العزلة .. يا اما بيحضر درس .. بينظم معسكر .. بيحشد لإنتخابات .. بيلم تبرعات .. أي حاجة تخليه في شغل مستمر .. في ساقية .. ما يهداش ابدا .. علشان مايفلتش ..
والحاجات دي اللي بتفرزلهم الناس اللي تنفع تشيل سلاح .. يدخلوا التنظيم الخاص .. والناس اللي ماتنفعش .. يشتغلوا في تجنيد الشباب .. والناس اللي عندها ميول قيادية .. يتبناهم المكتب .. وهكذا .. وكل واحد يترص في مكانه في التنظيم .. بس كده ..
فيه نوع تاني بقا مش محتاج كل الشغل ده .. الشاب الحلو اللي حكيتلكوا عنه ده بيتجوز واحدة اخوانية .. الأخوات اشتغلوا معاها وجندوها بنفس الطريقة .. وبيخلفوا عيل بجينات اخوانية جاهزة .. ده مش محتاج .. ده من يوم ولادته و هو مش بيعيط علشان يرضع غير بأمر المرشد ..
وفيه نوع تالت .. الإخوان مش بيحبوه أوي .. بس بيستفيدوا منه .. المنتفعين .. اللي انضم للجماعة علشان يستنفع .. وينفعهم برضه في أي حاجة .. علاقة مصالح يعني .. حتى لو كان تواصل مع امن الدولة ومع الحكومة .. عميل مزدوج يعني .. أو المنتفعين من الفقراء والأيتام .. اللي وجودهم في الجماعة بيسد احتياجاتهم .. والجماعة بتستغلهم في الحشو .. اعداد في المظاهرات .. اصوات في الإنتخابات .. وهكذا ..
آدي الموضوع من طقطق لسلامو عليكو .. آدي كل التركيبة الإخوانية .. وده تفسير حالتهم .. والإنجرار و التغييب والتنويم المغناطيسي اللي هما فيه .. وازاي اشتغلوا عليهم علشان يوصلوهم لكده .. وازاي بيصدقوا أي حاجة هبلة تقولها قياداتهم وممكن ينتحروا علشانها .. زي مرسي راجع .. والإنقلاب يترنح .. و دوبلير السيسي ..
علشان كده بأكرر .. خلوا بالكوا من عيالكوا .. بالذات في السن الخطر .. ولو ما احتضنتهوش وحسسته انه صاحب شخصية وله قيمة .. هايلاقي اللي يسحبه ويطبطب عليه .. وينزله يضرب نار ويشتبك ويموت نفسه .. علشان مرسي يرجع ..
ربنا يقدرني على فعل الخير .. وعلى فضح فكركوا الإسود قدام كل الناس .. يا ولاد دين البنا ..
----------------------
د/ تامر حسن DTH
الرجوع الى أعلى الصفحة اذهب الى الأسفل
 
الطريق إلى القطيع .. وكيفية التجنيد الإخواني ...(هام للغاية .. خدوا بالكوا من عيالكوا)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات سيفن ستارز :: قسم الموضوعات العامة :: الموضوعات العامة-
انتقل الى: